Sunday, January 28, 2007

أدعوكم للتعرف على حزب الوسط


منذ ما يقرب من 11 عام , تحديدا في نهاية عام 1995 ألتقى مؤسسو الوسط برئاسة المهندس/ أبو العلا ماضي – وكيل المؤسسين الحالي- ليترجموا فكرة انشاء أول حزب مدني بمرجعية اسلامية الى واقع .
و منذ بدايات تأسيسه و هو يضم عددا من الأقباط و الفتيات و السيدات ايمانا بحق المواطنة , تم رفض الحزب من قبل لجنة الأحزاب " الغير دستورية " حوالي أربع مرات كان آخرها في 6 / 1 /2007 رغم توصية هيئة مفوضي الدولة برئاسة المستشار القبطي / فريد نزيه تناغو بضرورة الغاء قرار لجنة شئون الأحزاب و أنه يرى أن برنامج الحزب متميزا عن برامج سائر الأحزاب الأخرى .
تم ممارسة العديد من الضغوط على المؤسسين ليتراجعوا عن مواقفهم و زعما بأنهم حزب تابع للاخوان المسلمين و لكن كان رد الفعل عكسيا فقد ازداد عدد أعضاء الوسط كل عام عن الذي يسبقه و قد أنضم اليه عدة رموز فكرية أمثال د/ عبد الوهاب المسيري الذي قام بكتابة برنامج حزب الوسط الجديد , والسياسي المخضرم / فكري الجزار الملقب بشيخ المستقلين في البرلمان المصري لعدة دورات وعدد من أساتذة الجامعات والقضاة والمحامين والمهنيين ورجال الأعمال والعمال والفلاحين 0000 الخ
و لقد انضممت اليه في مارس 2006 .
فإذا ما أردت أن تعرف أكثر عن تاريخ الحزب و أهدافه و برنامجه يسرنا أن ندعوك الى ندوة يلقيها وكيل المؤسسين م/ أبو العلا ماضي يوم الأربعاء القادم 31 / 1 / 2007 الساعة السادسة مساءا مقامة في المركز الدولي للدراسات - 51 شارع القصر العيني الدور الثاني

موقع حزب الوسط الجديد : http://www.alwasatparty.com/

برنامج حزب الوسط الجديد : http://www.alwasatparty.com/htmltonuke.php?filnavn=files/Ar-program.htm

فيلم وثائقي عن حزب الوسط : http://www.alwasatparty.com/themes/ahmadnabil/images/b6.gif

منتدى حزب الوسط الجديد : http://montada.alwasatparty.com/

Friday, January 26, 2007

بعيدا عن كل شئ.. حلم عبر


بعيدا عن السياسة و الصيدلة و الكتابة
و وجع المخ من التفكير
و شدة الاعصاب
و أن كل شئ لا يسير كما اتمنى
و ان حال البلد من سيئ الى أسوأ
و أن كل شئ تقريبا فقد معناه او كاد
عدت لكتابة القصائد مرة أخري
بعدما تخليت عن كتابتها
لماذا ؟
شعرت بأن الرومانسية في هذا الزمن
أصبحت مبتذلة
أو بمعنى أدق
معظمها زائف
بريق وهمي نراه خلف ستار سميك
و نحسبه حقيقة
فنزيح الستار بلهفة آملين أن نحصل عليها
لنجده سراب
منذ شهر تقريبا كنت فى الصيدلية
وجدتنى امسك بالقلم
و اكتب
***
حلم عبر

حلم عبر
فيض من نسيم
داعب عباءة القدر
*
*

حلم عبر
كطيف جاء ذات ليلة
يمنحني هالة القمر
*
*

حلم عبر
رجفة سرت
و دمعة هربت للسحاب
فأمتزجت بالمطر
*
*

حلم عبر
يسابق الزمن
يعيد نبض الحياة
لقلب يحتضر
*
*

حلم عبر
أمسك فرشاة الالوان
يمحو سراديب
الحزن المنتشر
*
*

حلم عبر
يعاتبني لسجنه
بين جوانحي
ايام طوال ينتظر
*
*
حلم عبر
****
تحياتي

Wednesday, January 17, 2007

صيدلة القاهرة.. مع حبي و اعتزازي

المقال ده
بفضل الله طبعا
نزل فى الدستور فى التيرم التانى السنة اللى فاتت
في صفحة التعليم و اللى بيتعلموه
مش فاكرة التاريخ صراحة
بس طلعت فيه قرفي من الكلية
و الحمد لله اتحقق مع أحد الدكاتره اللى جت سيرتهم
فى المجلس الاعلى للجامعات
و الحمد لله جت سليمة و اتخرجت
على عكس حسابات امى و ابويا
و الحمد لله
أدينى بدأت استخرج ورق التخرج
لاذهب بلا رجعة
عقبال ما اطلع غلي من كل اللى قارفني
تحياتي

Wednesday, January 10, 2007

مـن غــير ندب و لا زلت ألعق الصبر

سلام عليكم ..فيه كام ملحوظة الأول قبل قرآءة البوست ده .. مممم معلش انا داخلة سخنة .. بس يلا خروجا عن حالة الخرس اللى كنت فيها فالواحد زى بالونة و انفجرت
ملحوظة واحد : الطريقة المستخدمة في الكتابة لا تدل ان الشخصية ده هي صاحبة المدونة .. بس أعتبروني حالة شيزوفرنيا لم تكتشف الا مؤخرا
ملحوظة اتنين : لكل الأصدقاء اللى أفتكروا انى غادرت عالم الاحياء. أحب اطمنهم اني لا زلت على قيد الحياة رغم عن أنف الجميع و أنفي شخصيا .. و معلش لو كنت بهدلتكم من كتر الخواطر السوداء عني .. بس انتم عارفين لازم كل فترة و التانية انزل بئري النفسي لوحدى لاستكشاف الجديد
ملحوظة تلاته : لو محدش فهم تسلسل الاحداث أو الكلام مثلا مش مترابط .. مش مشكلة أوى . العيب فيا .. لأني مش ناوية أرتب الكلام المرة ده .. الحاجة المنظمة زيادة عن اللزوم بتخنقني .. و انا حاسة ان المدونة محتاجة شوية نعكشة
ملحوطة اربعة : نسألكم الدعاء بالتوفيق و السداد و الهداية
ملحوظة خمسة : مفيش بس أنا مبحبش الارقام الزوجية فلازم نخلي الاخر فردي
*******
الفترة اللى فاتت الحمد لله طبعا .. حسيت أني اخدت اكبر مقلب فى حياتي بدخولى لكليتنا المرموقة صيدلة القاهرة و ادينى اتخرجت و مش اكتشفت الموضوع ده الا دلوقتى ... من غير ندب .. ممكن عياط .. ندب لا
قعدت بدل ما اعيط و القطرة تخلص على عينى كالعادة .. فين المشكلة ؟؟ هل مثلا مبحبش الصيدلة ؟؟ دخلتها غصب عني؟؟ طموحي و اهتماماتى اختلفت عن زمان ؟
لاقيت كل الاجابات تشل .. ليه بقه .. لأنى بفضل الله طبعا .. في التعليم بالذات محدش يقدر يفرض حاجة عليّا .. حتى الوالد و الوالدة .. عارفين اني غير اخواتي فى الموضوع ده و فيه فى الدماغ فردة باتا . دخلت علمي علوم بمزاجي .. الكلية بمزاجي .. و عن اقتناع و حب كامل للاسف أخلصت لها و هي خانتني في الآخر ... و اتخرجت مش بمزاجي صراحة .. لو كان عليا كنت عايزة افضل طالبة على طول . الحمد لله اتخرجت من هنا .. انا كنت عارفه ان الامور مش وردية و سودا الى حد ما .. لكن اكتشفت انها كانت زمان سودا .. دلوقتى اتحولت لثقب أسود و لا عزاء لنا
واحد زميلي بيقولي انتى عايزة ايه اساسا بعد النخرج .. قلتله حاجتين بس .. فلوس و علم .. قعد يضحك و يقولى مش ح تقدرى تجمعي بينهم فى مصر .. قولتله خلاص يبقى فلوس عشان لو ح اقدر اغير حاجة .. ممكن اغير بالفلوس .. لكن عالمة و شحاته .. نهايتى ح تكون الموت كمدا.. و بعدين اساسا ازاى ح اصرف على العلم من غير ما يكون معايا فلوس.. الحاج الوالد رافع شعار .. أى مصاريف للدراسة بعد الكلية كل واحد يتكفل بها و هو لو دفع ح يبقى كدين و كده .. محدش بقه طيب اليومين دول
مجالات الابحاث اللى كان نفسي اشتغل فيها .. الحمد لله تقريبا منعدمة فى مصر .. و الله واحد اقترح عليا اتجوز و اسافر لو الموضوع في دماغي اوى .. بس قولتله عيب يعنى انا ممكن انتهازية .. بس مش للدرجة ده
المهم مفيش ابحاث.. يا فرحتى و انا باقدم على دراستى العليا و باشتغل فى صيدلية بعد الظهر .. فين التطبيق هنا .. اقصى تطبيق ح يبقى مسموح به هو في العقل الباطن... حاجة قرف
صحيح .. في وسط كل ده عرفت ان حزب الوسط اترفض للمرة التالتة خلال 11 سنة.. لما عرفت كنت عايزة حد يغطيني و يصوت .. خربانه خربانه شعاري المفضل اليومين دول
و أحلى حاجة بقه .. أن الواحد قدام العائلة الكريمة بقه مثال الفشل الذريع .. تسقيفة أمال . تشجيعه أمال .. يعنى أمي تيجي تقول لأختى لا. بلاش تعلمي كده لأحسن تبقى زى الهانم الكبيرة ... بيحرجوني صراحة
الوالد برضه .. أخر مرة افتكر انه اتكلم و هو مبسوط بيا .. كانت ساعة نتيجة الثانوية العامة.. بعد كده بقه يقول انا ربنا ابتلاني ب3 أمراض.. الضغط و السكر و ايمان.. بس عادي جداالراجل برضه حكم السن و كفاية انه استحملني 21 سنة و كام شهر اهوه .. بقيت اتحاشى الخوض فى نقاشات مطولة معاه .. عشان بتنتهي في الغالب ان ابنه عاقة لوالديها و اشيل ذنوب و الواحد مش ناقص
مش مشكلة الواحد مسستم نفسه على الوضع ده من زمان .. و مبحبش اساسا ابقى قدوة ولا نيلة .. محدش ينتظر مني حاجة
يعنى دلوقتى طيب اجيب الفلوس منين .. عايزة طرق مشروعة و تناسبنى انى اقدر اجيب فلوس.. توصلت لحل مؤقت .. رفع عدد ساعات العمل ل 10 ساعات يوميا .. ممكن اخد دبلومة في حاجة كده .. بس لسه مش قرار نهائي ..أقنع الوالد ان فلوسه اللى انا كده كده ح اسددهاله مش ح تضيع هدر .. البيوت اللى ماشية بالنظام الرأسمالي ده بجد عيوبها كتير
حد يسأل عايزة الفلوس أوى كده ليه .. طبعا البي أم الزرقاء ان شاء الله مفيش خلاف انى ح اشتريها لأن العربية ده زي ما كل اللى يعرفوني عارفين فيه كيميا بيني و بينها. بس ح اعمل ايه بالباقي .. فده عايزة بوست لوحدها قريب ان شاء الله
واحد اعرفه .. قاللى فيه كتاب كويس أسمه لا تقلق بشأن المال .. أبقى أقرئيه .. و ماله .. لما يخلصه ح اخده .. لان سيادته الكتاب مترجم و غالي .. انا مبحبش نظام الندب و البكاء على اللبن المسكوب .. بس اعمل ايه على راي الدكتور يقولى انتى في مرحلة ice break
بين فترة الدراسة و بداية الحياة العملية .. بس كده انا عايزة جرافة تشلينى
ممممم جرعة الاخلاص في النية و التصميم على تحقيق الهدف .. برضه لازم تزيد... انزل بكاميرا خمسة يا ابنى على وش البطلة و هي بتزود جرعة الحماس لنفسها .... تقريبا اخر فيوزاتي ضربت
عموما .. ادينى طلعت حبة من خنقتى شوية و لنا عودة قريبة ان شاء الله لو فضلت برضه عايشة يعنى
تحياتي