Tuesday, February 20, 2007

بقيت بطالة مقنعة يا شباب


سلام عليكم .. هو انا مبقتش طايقة أدخل البلوج.. مش عارفة ليه.. حتى مفروض أعدل الحاجات المكتوبة باللغة المسمارية فيها لكن منفضة تماما.. خليها كده لحد ما افوق لها
سبق و قلت أن الفترة اللى فاتت غيرت الصيدلية اللى كنت باشتغل فيها .. غير انى اشتغلت فى جرنال لفترة و بعدين الوضع معجبنيش و خصوصا لما لاقيت أن المرتب ح يبقى فى الارض.. أن ممكن ابقى شعيدة الكلمة .. بس مش دلوقتي يعنى.. لما يبقى معايا فلوس و أتحرر من سلطة رأس المال زى ما اتفقنا
المهم عرض عليا أحد الاصدقاء اللى دماغهم عالية و له علاقات في نقابة الصيادلة انى اشتغل هناك و امسك تحرير موقع النقابة بمرتب كويس ده غير اني ح اشارك فى تحرير مجلة النقابة برضه و ده بقه تمام.. و لو حبيت اظبط فى اي صيدلية نايت شفيت مفيش مشكلة
طيب كده تظبيط و الله .. المهم الاصدقاء المقربين قالولى .. النقابة ده بؤرة تجمع اخواني .. و انتى كتير بتصتدمي بالاخوان فبلاش ح تبقى زى البقعة السوداء فى الثوب الابيض.. بس هم الاذكياء مش عارفين انى مش باشد مع الاخوان لمجرد انهم اخوان .. ما انا اتعاملت مع تقريبا كل فئات البشر الفكرية و عادي جدا انا باحترم شخصية اللى قدامي ما دام لم يحاول فرض رأئه الشخصي عليا بالقوة .. يمكن انا اهم اسباب انى ساعات باحتدم مع الاخوان.. لما يستعملوا السياسية الاقصائية في فرض رأيهم.. مفيش حكاية ان اختلاف الراى لا يفسد للود قضية عند كتير منهم
المهم .. طبعا نفضت لكلام اصحابي.. على الاقل لما الاذان بيأذن بيقوموا كلهم يصلوا .. مرة حصلت انى كنت في الجرنال و سالت فين مكان الصلاة .. اتريقوا عليا
بس الشهادة لله اللى اتعاملت معاهم في النقابة و كلهم رجال على فكرة .. دماغهم كويسة يعنى.. انا مش اتناقشت معاهم في حجاة بره حدود الشغل الا يمكن الدكتور اللى عرفني عليهم .. ده من الاخوان المنفتحين فكريا
جيت بقه عشان استلم الشغل يوم الاحد اللى فات .. ان مش عارفة ح اقعد فين و لا حتى عنوان السايت.. مش مشكلة هو اول يوم كده دايما ملخبط.. المهم دخلت اقابل الامين العام اللى عمل معايا الانتر فيو اول مرة .. كنت ح أشد معاه. . حسيت انه بيغير كلامه و كل ما اقوله وضخلى طبيعة شغلى بالظبط يقولى كلام كده الواحد ميفهمش منه حاجة.. من ضمن اهم الاسباب اللى خربت المصالح الحكومية فى مصر ان مفيش لكل واحد شغلانة محددة
أكمل بعدين عشان أخيرا لاقيت حاجة اعملها
سلام

7 comments:

محمود سعيد said...

انا مستغرب بس ان الناس بتقول لك
انتى كتير بتتصادمى بالإخوان (صح كده انا كاتبها صح ولا انتى)

مع إنى شايف يعنى المفروض يكون فى شبه توافق

بس انا معاكى فعلاً فى التقسيم
إخوان منفتحين وإخوان منغلقين
إخوان ستايل وإخوان بلدى
إخوان مثقفين وإخوان أغبياء

لأنهم ببساطة بشر ..

Anonymous said...

Hoi bent Saad fainlly you are here, how are you. do not give up and keep doing your job. i do not want to say that aal moslim brotherhood are bad but i do not trust them, they think that they have the real islam but it their own way of thinking. Anyway have a nice day and i hope to hear from you


Sherif

Ma 3lina said...

heeeeeh

sa3ed 2a3da te2me3 bamia fe el nekaba
mosh moshkla ya benty isa te7'arty kosa el mohem enak bet7'ady floos

we aho enty 7atet7ny fel saydlia belil

Anonymous said...

مرحبا بكِ في بلوجر بيتا

انا غيرت الكتابة المسمارية، محتاجة وقت بس انتي أكيد بروفشنال

عبده باشا

walaaz said...
This comment has been removed by the author.
walaaz said...

فعلا؟ النقابة أغلبها أخوان ؟
طب كويس ان الواحد عرف

هم عامة نسبة مش قليلة فى الكلية برضه

--------

اتفق معاكى بشدة فى مآساة عدم وجود
job description
فى بلدنا الجميل
-----------
بالنسبة لأنك ملكيش مزاج تدخلى المدونة ..أعتقد عشان شيلتى جوليا

رجعى جوليا بطرس يا دكتور ومزاجك للتدوين هيتظبط ع الاخر :)

Hamed Ibrahim said...

من فترة كنت بكلم صديق يساري المهم برغم إني مش إخواني بس ميولي إخوانية
فبيقولي ومستغرب
إزاي حد له ميول إخوانية وبيسمع مارسيل خليفة ووجيه عزيز

أنا أستغربت جدا من كلامه

بس فعلا فيه ناس واخدة فكرة سيئة عن الإخوان
ما أنكرش إن فيه ناس منهم منغلقين
بس فيه ناس جدا منفتحين ومخهم رائع
وعلى فكرة
فيه حاجات بسيطة تفصل حزب الوسط عن الإخوان
وهيا كلها قضايا فكرية يجوز فيها الخلاف
البعض منها بأيد فيه الإخوان والبعض بأيد حزب الوسط
أقصد أقول إن لو الإخوان منغلقين مثلا يبقى حزب الوسط منغلق برضه بس أقل إنغلاقا من وجهة نظر العامة

وده خطأ طبعا
كل مكان فيه السيء والجيد
بس إحنا ما بنكنش عادلين

ربنا يوفقك في الوظيفة الجديدة

صحيح كنت عايزك تبعتيلي أغنية أهو ده اللي صار بصوت البنت اللي كنتي حطاها قبل كده في البلوج

تحياتي