قبل السؤال عن معنى عنوان البوست سأشرحه لكمكنا في الكلية أول ما بنتعب أو بنزهق انا و الشلة الخربانة بتاعتي.. نبدأ نهس .. نهس بمعنى .. نعمل دماغ .. مش بالوسائل الغير قانونية عشان مخكم ميروحش لبعيد... كنا نعمل اى حاجة بنحبها عشان نطلع نفسنا من الموود المقرف اياه
أفتكر مرة كنا متجمعين و قعدنا نغني بقرة حاحا بتاعة الشيخ امام بصوت عالي لدرجة ان الناس قلقت من الامن
المهم الفترة الكئيبة و التى لا تزال تلقي بظلالها على نفسي .. حاولت أتخلص من تأثيراتها السلبية لكل الطرق الممكنة لآنسة زيي
يمكن الناس مش مستحملة الكآبة .. على رأي صديق أتصل بيا يقولى جرعة الكآبة زايدة عندك اليومين دول و كده مش حلو للجمهور
كنت عايزه أقوله انى نويت افتتح برنامج على المدونة بعنوان ( مالا يطلبه المستمعون ) بس نسيت
المهم كنت باقول انى الاسبوعين أو العشر ايام اللى فاتوا كنت باهس جامد .. مش باقعد في شيفت الصيدلية كتير لأن مرارتى مبقتش مستحملة الصيدلية بالزبائن بالمهنة كلها
أمبارح على سبيل المثال كنت مخنوقة بأقول للدكتور معايا وهو راجل كبارة عنده حاجة و اربعين سنة و للمساعد اللى معانا و ده اصغر من بخمس شهور تقريبا انا اتخنقت بقه .. اتصرفوا .. زهقااااانه يا ناس و قعدت ازق الكراسي برجلى .. معلش أصل غضبي عيالي شوية
لاقيت الدكتور الكبارة بكل براءة طلعلى عسلية كبيرة بالسمسم و لب اسمر و بيقولى طب خدى و يا رب تنبسطى !!!! هيييييييييه عسلية
المساعد أكل معظمها تقريبا بس انا اللى قعدت اضحك عليه هو رد فعل الدكتور .. ايه علاقة زعلى بالعسلية .. بس يشكر برضه
*****
رحت ندوة مع أحد الاصدقاء بعنوان الطب في مصر الفرعونية و المتكلم فيها كان الباحث بسام الشماع كانت في ساقية الصاوي .. عجبتنى جدا و عجبنى اسلوبه و طريقة عرض الموضوع و بصراحة عرفت معلومات لذيذة اوىىى
صديق بيقولى و ده من ايه .. ايه اللى خلاكي تروحي ندوة زى ده .. يعنى حبيت ابطل تعاطي سياسة شوية لحد ما حالتى النفسية تتحسن .. فيه علوم كتيرة الواحد مش عارف عنها حاجة .. فيعنى خلي الواحد يتثقف شوية
****ندوة اخرى في الساقية بعنوان دعوة للتفكير كان المتحدث فيها عبد المنعم الصاوي شخصيا .. تناقشنا فيها فى المشاكل اللى بتواجه العملية التعليمية و خاصة المدارس و سبل حلها .. و الحمد لله الناس معظمهم داسوا بالكلام فى المشاكل لكن محاولات الحلول .. تقريبا لا شئ
و تقولولي بطلي سوداوية .. ما هو اللى يأشوفه مش شوية
****
المهم بقه رحت مع شمس الدين حفلة فرقة اسكندريلا في الساقية ... كنت اول مرة احضر للفرقة ده رغم انى اسمع عنها من زمان .. بس صراحة عجبتنى موووت استخدامها لطريقة سيد درويش و الشيخ امام فى تلحين و غناء الاغاني .. و اغاني فؤاد حداد لا يعلى عليها بصراحة .. يمكن اكتر اغنية عجبتنى كانت بعنوان أهل الشام . كانت هي مسك الختام
بصراحة فرقة رائعة ... بجد دول اللى اتمنى انهم يستمروا
*****
باظبط بحث حاليا مع زميل عن التطرف العلمانى في تركيا .. الموضوع عاجبني جدا و خصوصا أن المشارك معايا شبهي في جزئية انه بيحاول يخليه موضوعي لأقصى درجة و بيبعد عن الاتهامات المسبقة .. معايا كتاب شديد عن الموضوع ده لانى اضطريت اجدد اشتراكي في مكتبة مبارك عشان ينفع استعيره .. اسمه السيف و الهلال تركيا من اتاتورك الى ازبكان مؤلفه رضا هلال
****
طالع عليا اليومين دول بما انى بقيت اروح الساقية بمعدل اكتر من الاول انى اتعلم يوجا.. يمكن انفع في حاجة
****
ضحكت اوى من اللى حصل للاهلى مع انى المفترض أهلاوية بصراحة اللاعيبة عندنا بيظهروا على حقيقتهم قدام الاجانب .. و البلهاريسيا بتطفح و بيكون منظرنا عاااار
اتبعتتلى مسج اول ما خلص الماتش مكتوب فيها
الريس + حفيده + طنطاوي + نظيف = 4
هههههههههههههه
معلش خيرها في غيرها يا شعب عايز يطع غله و حسرته في اى حاجة و برضه مش نافع .. عليكم واحد
****
مفقوعة من نفسي فيا عادة غتته .. ابدأ في كذا كتاب مع بعض .. و بعدين احتار اكمل مين الاول .. بس على اولويات الكتب حاليا كتاب و الله نسيت اسمه .. سوري الزهايمر .. عن معالجة الغضب
****
اه النهارده رحت مع اتنين اصحابي ندوة محاضرة كده عن الطبيعة في سيناء و المحميات الطبيعية فيها و كده .. كانت حلوة اوى .. بس كالعادة فى النهاية اكتشفت ان كل حاجة حلوة فى البلد ده يتم القضاء عليها على اكمل وجه
****
ادعولي .. على شعرة و اسيب الصيدلية الفقيييعة اللى انا فيها حاليا .. لانها احد اسباب قرفي .. و اروح صيدلية تانية .. بس لسه الموضوع مش اكيد
****
يعنى الخلاصة .... انا مش سايبة نفسي للخنقة .. بس معلش برضه الواحد مننا بنى ادم ... مش أدوس على زرار .. هوب انسى كل اللى خانقنى في لحظة
****
أجدع كلمة باضحك كل ما افتكرها حاليا .. كلمة مشهورة للمساعد اللى معايا في الصيدلية
فجأة يقولى .. دكتورة .. انا مبقتش اخاف ... اعملي اللى انتى عايزه تعمليه .. اقوله بجد يا محمود ؟ أمال بقيت ايه ؟ يقولى
بقيت أخاف أكتر
:)
تقريبا ده بتنطبق علي ناس كتييييييير جدا حاليا
تحياتي للجميع و عذرا للازعاج
رجاء الدعاء بالسداد
18 comments:
حاضر ياستى هدعيلك
يارب تسددى اللى عليكى :D
بقرة حاحا
تركيا من الشبشب للصندل
:D
يوجااااااااااااااااا
الله يرحمك يا ست فيسا
اصدى يا بنت سعد
:D
انتى متأكده ان الهسهسة دى بتحصل بوسائل قانونية
ممممممممممم
ماعلينا
:D
وكلنا والله هندعيلك
روحى يا شيخة وتعالى تانى
My frnd el mehisa 3la tool :)
miss yaaaa
bs ih nashret el akhbar di kolha , we el nadwat dih mash alah rabna mai2t3lek 3ada
wish u best of luck in ur new job
مش عارفه اقولك ايه بس انا قريت البوست ده وانا فى قمه خنقتى وزهقى بجد
مع البوست اللى قبله
اشعر انى داخلى عصفور يختنق
اعتقد انها كده كملت
بيقولو اليوجا بتهدى النفس جدا
بتساعد على الراحه
بفكر اجربها انا كمان
انا حاسه انى بهيس فى الكومنت
اسفه بس متلخبطه شويه
تحياتى
هههههههههههههههههههههه
الدكتور ببساطة اداكي عسلية يا ام السعد علشان عارفك
الناس اللي مش عارفينك لسة
و بعدين يوجة ايه اللي انتي عاوزة تخوضي فيها
اليوجا دي عاوزة واحد مش بيتكلم
فامهاني؟ مش بيتكلممممم
مطلوب صيدلي أو مساعد صيدلي
للعمل بصيدلية علاء الدين فترة مسائية من 6 إلى 2 صباحًا
العنوان :86 ش بديع شبرا مصر القاهرة
الهاتف :0224578880/0103115627
اول الشهر بكرة
متنسيش الجمعية D:
دمتي بخير
إلى جميع الأخوة و الأخوات
زميلتنا المدونة وينكي تعرضت لموقف خطير أدى لحذف مدونتها، و مما تسبب لها باحباط شديد فقررت ترك الكتابة إلى الأبد و اعتبرت نفسها ميتة
و لأننا نحن المدونون كلنا يد واحد و رزمة أقلام مجتمعة، أتمنى أن تشاركونا بهذه الحملة لاقناع وينكي العزول عن موقفها السلبي و لمعرفة ما حصل معها تماما
رابط الحملة وينكي لن تموت من هنا
أرجو من الجميع مساندة الأخت وينكي
http://gayofsun.blogspot.com/2007/04/blog-post_29.html
مااوعديكيش اني هحاول قدم اي مساعدة يا
gayofsun
استاذى المجهول الاول و الثاني
بطلوا تريقة بالله عليكم
:)
كده ح اغضب عليكم
و ....
قد اعذر من انذر
تحياتي
ما علينا العزيزة
ربنا يخليكى ليا يا بت
اهوه انتى من الناس اللى بتهون على الواحد
ربنا يخلينى ليكي
:)
ريمووو
و لا يهمك
اديها بقه تهييس
و خليها فى اللذيذ
:)))))
كلنا مهيسين
و تحيا مصر
احمد المصري
اكيد كده يبقى اليوجا متنفعش لأمثالك يا ابو الرغي كله
سلاموز
استاذي المجهول
معذرة
ده مش صفحة للاعلانات المبوبة
:)
انا مرضتش امسح التعليق بس رجاء عدم تكراره
تحياتي
شمس
الله يخرب بيت الجمعية
حاااااااااضر
ربنا ياخد اللى في بالى
تحياتي يا ختى
gayofsun
ربنا يسهلو نقدر نقدم اى مساعدة لها
تحياتي
عمرو المصري
تحياتي لك برضه
بنت سعد يا ينت سعد
ههههههههههههههههه
والله ضحكتيني
.
.
شوفتي بقي الناس المثقفة اللي بتفهم في البلد دي حاله عامل ازاي.
.
.
ياعني يوم ما تحب تعمل دماغ
تغني البقرة حاحا
هههههههههههههههههههههههه
.
.
ولا يوم ما تحب تبطل سياسية علشان ما تكتئبشي تروح تحضر ندوة عن الطب الفرعوني في الساقية
.
.
والله يابنتي انت حد خسارة في البلد دي
زي السكر الله يخرب بيت عقلك
ههههههههههههههههه
تحياتي والسلام
بصى يا بنت سعد
الحاله الى انتى فيها دى طبيعيه بتروح وتيجى
لالالالالا
مش ساعه تروح وساعه تيجى لا والله من غير تريقه
كل الشباب بيمروا بالحاله دى يعنى وضع طبيعى كل فترة وانا نفسى كانت لسه عندى ودلوقتى فى نهايتها قربت تخلص
ربنا يسهل
Post a Comment