Sunday, July 08, 2007

تــــاج رغم أنفــي


اهوه باجاوب التاج بضمير اهوه
ده كنت في مكتبي ايام شغلى فى النقابة كملحق اعلامي قبل ما اسيبه و ارجع لعامة الشعب
:)
******
محمد العناني
ارسل التاج ده لي
و ده تاني تاج يرسله
انا مش جاوبت على الاولاني
لكن اكيد
مش ح اكسفه المرة ده و ح اجاوب على التاج ده
*******
أنت مين ؟
انسانه تريد الا يكون يوم تموت فيه
هو ذاته يوم ولادتها
دونما تترك أى أثر في هذه الدنيا تلاقي به ربها
*****
مين أكتر ست شخصيات بتحبهم ؟
اولا مش بحب الارقام الزوجية
:)
ثانيا انا مقسمة الناس اللى اعرفهم فئات
فيه فئة العائلة
فيه الاصدقاء
فيه المفكرين
و هكذا
فأنا ح اجاوب السؤال ده على التوازى و اخد من كل فئه أقرب شخصية لي
من عائلتي : أمي .. اللهم انى اسألك لها نعيما لا ينفذ في دنياك و آخرتك على ما تتحمله من اجلنا
من اقربائي : خالتي يرحمها الله و اسكنها فسيح جناته كانت مثل أمي او تزيد
من صديقاتي البنات : مرام
من أصدقائي الشباب : عبد الله
من علماء الدين : الشيخ محمد الغزالي رحمه الله و غفر له
كان السبب في عودتي الى الاسلام بعدما كنت اميل للعلمانية في صغري
من المفكرين المصريين : د. جلال أمين
من المفكرين العرب : د. محمد الاحمري
من المفكرين الاجانب : ستيفن كوفي الامريكي
من الشعراء : احمد مطر شفاه الله و عافاه
من المغنيين : جوليا بطرس
*****
أنت سعيد ؟
المسألة نسبية
ربما كنت أفتقد مشاعر معينة لكي تكتمل سعادتي
الا اننى تعلمت الا يتعارض طموحي في حياتي العملية و الاجتماعية مع الرضا
****
لو اجتمعت انت و حسني مبارك في غرفة واحدة ح تقوله ايه ؟
لا شئ .. لم يعد هناك ما يقال
ربما اذا كان لي مزاج للسخرية
ألقي على مسامعه قصيدة حبيب الشعب لأحمد مطر
*****
لو معاك مليون و نص ح تعمل ايه ؟
و هم دول يجيبوا ايه فى الزمن ده
ح اجيب بهم ارض عشان تبقى نواة مصنع الادوية
:)
ان شاء الله طبعا
******
بتحب مصر ؟
ينطبق عليا جزء في قصيدة لصلاح جاهين يرحمه الله
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
******
بتحب البنات ؟
هههههههه ده سؤال ذكوري
البنات او الاولاد الجنس مش بيفرق معايا
المهم الدماغ لا مؤاخذة
:)
و بما ان نسبة الهيافة فى البنات اللى عرفتهم على مدى سنين عمرى كبيرة اوىىى
فتلاقيني منسجمة مع المجتمع الذكوري اكتر بس لو لاقيت بنت بجد بتشغل دماغها باطير بها
:)
بس انا بحب كوني امرأة على فكرة عشان محدش يفهمني غلط
******
ايه اكتر موقف محرج اتعرضت له ؟
هههههههه
المواقف كتير بصراحة
يمكن اكتر مواقف اتكررت معايا
نومي فى السكاشن و المحاضرات و احيانا الامتحانات
:)
اصلى ملولة جداااااا و باتفقع من اللت و العجن و التركيز بواسطة الحاسة السمعية فقط عندي ضايع شوية
و طبعا لما باتفقس و ده بيحصل كتير
بيكون منظرى عااااار
*****
ايه اكتر امنية نفسك ربنا يحققها لك ؟
انى اصل للحق
و أوتي الحكمة
و من اوتي الحكمة فقد اوتي خيرا كثيرا
****
خلاص تمام كده يا محمد يا عناني
انا فى السليم
:)
اما بقه التاج ده ح اخبطه في مين
ما علينا
شمس الدين
بنى ادم
free fighters
hyperminds
كبير المتشردين
جميلة بو حريد
سناء البنا
روبابيكيا
ماك
احمد المصري
مبرمج حر
سوسة المفروسة
محمد جادو
مؤمن محمد
محمد الدوح
ادم المصري
محمد عبد الغفار
داليا - صوت الحب
شهروزة
spellz

16 comments:

محمود الدوح said...

مبروك
وتوفيق فى اجابة التاج
وفعلا السعادة شئ نسبى

مطرح ما ترسى....دقلها said...

very great
so i can invite u to my blog

please come and see

صاحب البوابــة said...

بصراحة مدونة جميلة للغاية

عرفتها بالصدفة البحتة

واندهشت كثيراً كيف لم اصل اليكِ من قبل

مع أن جميع المدونين اصدقائك هم من اقرب !!! الاصدفاء لي

تحياتي اختاة

واجابات جميلة للتاج

أحمد said...

:))
أنا اساسا ليا عندك تاج من 3 شهور , يعنى بقاله ردح من الزمان عندك لغاية ما حمض خلاص

عشقك ندي said...

متشكرين علي الغنوة أولا
الاجابات جميلة ماعدا -من وجهة نظري طبعا-جملة عودتي للاسلام بعد ما كنت علمانية ربما هناك خلطا في المفاهيم فليس من هو اسلامي بالضرورة غير علماني والعكس العلمانية ليست تهمة تنفي وانا لست من أنصارها ولا أدعي انني علماني لكنني اوضح اننا نحتاج لكي نفسر المفاهيم بشكل اكثر دقة
ولعلمك ان الشيخ الغزالي كان يتهم انه كان علماني والمفتي لمستنير د0علي جمعة يتهم بانه علماني الدين يا جماعة ليس ستارا يفصلنا عن عالمنا لقد قال الرسول الكريم اعمل لدنياك كأنك تعيش أبدا واعمل لاخرتك كأنك تموت غدا
المسألة هي توضيح هل كنت تنكرين الاسلام اصلا هل كنت تتبنين الافكار الوجودية الماركسية هل كنت تنكرين وجود الله
معلش انا يمكن غلس بس بازعل لما الاقي دماغ حلوة وتشطح منها حتة كده

Anonymous said...

انتي قديمة اوووي يا ايمان ما انتي لو بتدخلي عندي كنتي عرفتي ان التاج ده اتجاوب من زمان

محمد عـنـانـى said...

جزاك الله خير
وانا شاءالله توتي الحكمة
ولس فى تاج قديم
هههههههه
تحياتى

admelmasry said...

اجاباتك كلها قطعية وصريحة
زي نوع الاشئلة بالظبط
.
.
.
وتدبيسة التاج دي مش ناسيهالك ابدا

جميله بو حريد said...

ايه اكتر امنية نفسك ربنا يحققها لك ؟
انى اصل للحق
و أوتي الحكمة

اجابتك جميله اوى فكرتنيى بنبت خالتى كنا لسه بنتكلم عن هدفها فى الحياه قالت الحق

ميرسى على مطب التاج ده لن انسا هذ المزنق

mohamedgado said...

يعنى اجاباتك مش بطاله
هاقولك يا ستى
اول حاجه مش عاوزه تموتى يوم عيد ميلادك
ده على اساس انك عاوزه بعد ماتموتى بعد عمر طويل يعنى تبقى تحتفلى بعيد ميلادك من غير احزان
لو اجتمعتى مع حسنى مبارك مش هاتقوليله حاجه
ده ايه السلبيه دى امال احنا بنعيد ونزيد فى ايه ..... دى حاجه غريبه
وكمان بتتنمردى ع النعمه قبل ماتيجى
هما المليون ونص هيعملوا ايه
وبعدين بتتهمى البنات بالهيافه وقلة العقل
وانا متفق معاكى
وبتنامى فى السكاشن يعنى مش فايقه لمصلحتك
هاتيجى منين الحكمه بقى ما خلاص
ههههههه

على فكره انا بضحك معاكى
وحكاية التاج دى انا مش هاكسفك
بس ماتبقيش تعلقى عليه لما اكتبه
وسلام

spellz said...

leeeeeeh ta3meleeli tag leeh
msh b3rf ul ih:D
3mooman:D merci 3l tag ya setty hab2a a7awel a3melo isa:D

Ma 3lina said...

انا مجاوبة كله انا شطوورة صح
بقولك ايه ليك تاج عندى يا بنت

بس قوليلى مين المصور الجامد اللى وخدلك الصورة دى شكله محترف

:p

إيمــــان ســعد said...

محمود الدوح

انا مررت التاج لك على فكرة

:)

بس كتبت اسمك محمد

معلش غلطة مطبعية

تحياتي

*****

alemeder

اكيد طبعا تقدر تدعوني

:)

ح ازوها اكيد ان شاء الله

تحياتي

******

صاحب البوابة

:)

معلش الدنيا صغيره

انا اوقات بأدخل مدونتك من عند شمس الدين

تحياتي لك

*****

مبرمج حر

:)

حاااضر

يعنى لازم التشريد ده

:)

ح اجاوبه هو و التاج بتاع عنانى التانى

و مش تقلق مش ح يحمض

امال انا صيدلانية اى كلام و لا ايه

تحياتي

*****

إيمــــان ســعد said...

عشقك ندي

:)

انا عارفه موضوع الاتهامات اللى وجهت للشيخ الغزالى

بس انا لما قصدت كلمة العلمانية بمعنى كره الدين

:)

للاسف ثقافتى من صغرى كانت اجنبية مش تفهم غلط .. انا كنت فى مدارس حكومية عادية بس كانت قراءاتى كلها لناس اجانب

و كل ما الاقى تصرفات غلط .. اتخنق جدا لما الاقى الناس تنسبها للاسلام

فكرهت القرآءة فى الدين او التعرف عليه لمدة

لكن لما قرات مصادفة

قضايا المرأة كتاب للشيخ الغزالى

كان بداية تغيير وجهة نظرى عن الدين

يعنى نقدر نعتبرها .. ممممم علمانية جزئية اللى هى بتنادي بفصل الدين عن الدنيا

:)

تحياتي

*****

كبير المتشردين

:)

حقك عليا يا كبير
هو بس انا الايام ده عشان الشغل الجديد مبقتش عارفه اتابع مدونات اصدقائي زى الاول

:)

بس ملحوقة ح اخبطك باى تاج تانى

تحياتي

******
محمد العناني

:)

شوف طمع الناس يا اخى

ماشى يا ابنى ح اجاوبه ان شاء الله

بس شوية كده

:)

مش تستعجل على رزقك

تحياتي

*****
ادم المصري

انت عارف ان مشكلتى الصراحة يا عم

و بعيدن انا مبتهددتش

اعلى ما فى خيلك اركبه

:)

تحياتي لك فى راس البر

*****

جميلة بو حريد
:)

الله يخليكى

و بعدين يعنى انتم منتظرين ادبس مين غير اصحابي

:)

اللى مالوش خير فى اصحابه
مالوش خير فى مدونته يا بنتى

:)

تحياتي

*****

إيمــــان ســعد said...

جادو العزيز

:)

مش ح اقولك غير حاجة واحدة

لما اشوف اجاباتك على التاج يا ابنى

:)

و بعدها لينا كلام تانى

:)

تحياتي يا باشا

****


سبيلز

لا حاولى تجاوبيه فى وقت فراغك الله يكرمك

بس الاول انجزى فى مذاكرتك .. ربنا يوفقك يا بنتى

تحياتي

******

ما علينا

ممم مع ان الصورة مش عاجبانى اوى يعنى

:))))

يلا بس مش حبيت اكسفك لما وريتهانى اول مرة بعد ما صورتيني

:)

برضه باحب اشجع الشباب زى ما انتى عارفه

تحياتي يا اختى

ســـارة said...

جميلة قوي الصورة يا إيمان :)