التخلي عن البالطو الأبيض ...في سبيل الحلم 2

كنا بنقول ايه يا بشر ؟؟ أدندن كثيرا باغنية منير هذه الايام .. ياللى بتسأل عن الحياة خدها كده زي ما هيا .. فيها ابتسامه و فيها الاه فيها قسية و حنية .... فعلا كلماتها معبرة جدا ... المهم دخلت قسم السوائل .. يعنى الادوية الشرب ... يعنى العك على ودنه

من اول المياه المعالجه اللى فيها سيدوموناس و ده كائن طفيلى المفترض يبقى نسبة وجوده في المياه المعالجة ده زيرو .. لحد لخبطة التشغيلات على بعض و مزج تشغيلة قديمة بأخرى جديدة لحد ان يبقى فيه حشرات فى تانك التحضير و هلم جرا .. مش عايزة اقرفكم اكتر من كده . لكني كنت وصلت لمرحلة اني كنت بأبكي و انا بأصلي عشان حاسة اني بأبيع ضميرى ببلاش كمان

بس الحمد لله أخدت وقفة و لميت الموضوع شوية

مممم طيب كل ده يا شباب .. التنطيط ده متعب جدا .. تلاقي اصحابك اللى اشتغلوا من اول ما اتخرجوا فى شغلانة تقدموا فيها و اترقوا وربنا يوفق الجميع و انت لسه بتجرب فى الطرق .. الموضوع ده جه بعد 10 شهور من التنطيط و بدأ يخنقني فعلا .. بس قبل كده انا كنت اديت نفسي عذر انى مش ح ارفض اى حاجة فى اول سنة من التخرج تعرض عليا من غير ما اجربها.. و ده كان اللى بيحصل .. عشان مرجعش اندم اني ضيعت فرصه من ايدي بعد كده ... بس طبعا الحاج الوالد مكنش بياكل معاه الكلام ده .. يعنى من اول ما اتخرجت و هو قاللى عيشي حياتك مع نفسك بقه .. تشتغلى يوم و عشرة لا .. ماليش دعوة.. فلوسك اللى بتقبضيها ظبطتي بها حياتك

طبعا .... كان كده زى ما البنك الدولي رفض يسلف مصر فلوس عشان السد العالى .. بس ولا همنيّ ..هي صحيح الحياة كانت و لا زالت ضنك اوى اذا ما قورنت بالحياة و انا لسه طالبة .. بس لما رحت لأبويا فى مرة اطلب منه فلوس و هو رفض .. مش كررتها بعد كده

من الاخر اتفقنا ان نفسي عزيزة عليا اوى ... بس بينى و بينكم اتشحورت اوىىى... ما علينا .. هو ابويا بيقول اني نمرة .. و بصراحة اكتشفت اني كذلك فعلا

المهم طبعا حاولت اشوف نظام عمل الدراسات العليا و انا فى الشركة المأسوفة ده .. طبعا لاقيت انهم ح يذلوا اهلي .. و تقريبا ح يمتصوا دمي سواء فى موضوع الاجازات اللى ح تبقى عل ىحسابي او انهم ح يوافقوا فقط على البحث اللى يفيد الشركة او بلاوى تانية لا داعي لذكرها .. المهم لاقيتنى ح اتذل لحد ما يطلع عينى و كل ده عشان شهادة ماجستير ... يا خي بلا هم

****

قلت قبل كده انى فعلا بحب العلم .. لكن فى بلد تقدر ده و تخلى الواحد يعيش عيشة محترمة .. مش ابقى عالمة و شحاته لا مؤاخذة .. انتم شفتوا ابويا .. نفض لي تماما ازاى .. و انا مش ناوية اقضي حياتي على المعونة الخارجية

المهم في غمار كل الاحداث ده زى ما قلتلكم بدأ تفكسري يزداد عملية بمعنى ان الواحد لازم يبقى مرن في تغيير مخططاته مش يبقى زى الطوبة حاطط خطة و يقول يا كده يا بلاش.. عشان ح ياخد على نافوخه فى الاخر و يبقى يجيي يقابلنى ..كنت في مرة فى المكتبة مع صديقي الطباوي بما انه باعتبره قريني الفكري .. و فاهم اسلوبي فى التفكير بأتنتقش معاه فى الحوسة اللى بقيت فيها

لاقيته بيفتح معايا موضوع ادارة الجودة .. و اني ممكت اقدم على ماجستير فيها تبع الاكاديمية البحرية .. المهم سألت على الموضوع ده كويس و كنت محتارة اخده تبع الجامعه الامريكية كدبلومة و لا اقدمه كماجستير فى الاكاديميمة لحد ما قررت اتوكل على الله و اقدم في الاكاديمية .. طبعا الفلوس كتير .. مكنش فيه قدامي غير أمى .. تسلفني المبلغ و ابقى ارده لها لما ربنا يفتح عليا بقه ... هى كانت الحاجة بدأت تحس بالذنب .. لاني يا ولداه اقل واحدة فى عيالهم صرفوا عليها... بس انا مبحبش اضغط على الجرح يعني .. المهم انها وافقت تسلفني

و ادينى قدمت على الماجستير و لله الحمد و الدراسة ح تبدأ بعد العيد .. ادعولي .. اما بقه ليه عجبني ادارة الجودة ده بالذات .. لانى عن طريقها ح اقدر ادخل المصانع و الشركات من فوق .. بمعنى ان ادراة الجودة و الاتش ار .. هم من الاخر كده شغل المستقبل ..حلمي اني اشتغل فى شركة عالمية و يبقى الواحد كده يقدر يأثر في سياسة الشركات ده .. مش انى اشتغل فيها من تحت و خلاص

المهم ح ابقى اشرح الموضوع تفصيليا بعد كده .. نيجي بقه على الشق التاني فى حياتي

من ضمن اهم الاسباب اللى كانت قارفاني و انا قعدة كده مع نفسي باتكلم بصراحة .. اني كل اهتمامي منصب على الناحية الاقتصادية في حياتي او الناحية العملية... اما الجانب الفكري فتم ذبحه داخلي .. كأني بقيت احادية البعد الانساني على رأي المسيري مما سبب لي خنقة مش قادرة اوصفها.. لدرجة اني بقيت فعلا حاسة ان فيه حلقة مفقودة جوايا مش قادرة بسببها استمتع بفرحتي اني اخيرا بدأت احدد هدفي

فكان القرار الاتي .. الا و هو .. تقديم اوراقي للانتساب بكلية الاداب قسم الفلسفة بجامعة القاهرة

مش قادرة اقولكم على مقدار الراحة و الفرحة اللى حسيت بها و انا باخل القسم واقف قدام اليافطة اللى مكتوب عليها قسم الفلسفة لاول مرة .. لدرجة اني خليها الباك جروند بتاعة موبايلى بعد ما صورتها .. ياااااه اخيرا الحتة المخنوقة اللى كانت جوايا اتهدت بقه و سكتت

شعور انى داخلة طالبة فى الفرقة الاولى ده بغض النظر عن التريقة اللى اخدتها من اصحابي و على فكرة مقلتش للعائلة الكريمة على الموضوع ده و مش ناوية اقوله الا لما انجح ان شاء الله في اول تيرم عل ىالاوق .. لاني مش عايزة ادخل في موود شدة اعصاب ان الكل منتظر لي عل ىسقطة ليبدأ فى تأنيبي .. انا لما بادخل فى المود الزفت ده ... تلاقيني تنحت و اتلخبطت و كل حاجة ضاعت

جيبت من صديق لي فى سنة اولى برضه كتاب تاريخ الفلسفة اليونانية و بدأت اقرا فيه .. لذيذ جدا .. عارفه اني بحب الفلسفة .. كان اسم شهرتي فى تانية اعدادي افلاطون :) ادعولي بقه بدأ اشوف المنهج من دوقتى عشان امتحانات التيرم بتكون فى يناير و امتحانات الماجستير بتكون فى فبراير

محدش يقولى كده بتشتتى نفسك.. انا الحمد لله هارد ووركر .. ولما بتكون نفسيتى مستريحة من جميع الناوحي .. بيكون ادائى افضل رغم ان العكس هو اللى بيكون الكل منتظره

اشبعت رغبتي فى كلا الناحتين فى نفسي .. العملية و الفكرية

المهم بقه.. ادعولي .. لاني عارفه اني اخترت الطريق الصعب الى حد ما

بس ان شاء الله أدها

الكلام لسه مش خلص .. بس مفترض ادخل اتنيل انام عشان المخروبة الشركة بكره

تحياتي